आखाडे–हुमगावमध्ये बिबट्याचा वावर; वनविभागाच्या उदासीनतेविरोधात शेतकऱ्यांचा संताप
आखाडे–हुमगाव परिसरात बिबट्याचा धुमाकूळ; वनविभागाच्या उदासीनतेविरोधात शेतकऱ्यांचा संताप
आखाडे–हुमगाव (ता. …) परिसरात मागील एक महिन्यापासून बिबट्याचा मुक्त वावर सुरू असून ग्रामस्थांमध्ये भीतीचे वातावरण निर्माण झाले आहे. भरदिवसा रस्त्यांवर, शेतशिवारात आणि वस्तीच्या आसपास बिबट्या दिसत असतानाही वनविभागाकडून कोणतीही ठोस कारवाई होत नसल्याने शेतकरी आणि ग्रामस्थांमध्ये तीव्र संताप व्यक्त होत आहे.
या परिसरातील शेतकरी व नागरिकांनी वारंवार वनविभागाच्या अधिकाऱ्यांना फोन करून परिस्थितीची माहिती दिली. मात्र, अधिकारी कोणताही प्रतिसाद देत नसल्याचा गंभीर आरोप शेतकरी संघटनेचे अध्यक्ष श्री. कमलाकर नाना भोसले यांनी केला आहे. बिबट्याच्या वावरामुळे शेतीकामासाठी शेतात जाणे धोकादायक झाले असून महिला, लहान मुले आणि वृद्ध नागरिकांमध्ये प्रचंड भीती पसरली आहे.
आज वनविभागाचे अधिकारी गावात दाखल होताच परिसरातील शेतकरी आणि आखाडे ग्रामस्थांचा उद्रेक झाला. यावेळी श्री. कमलाकर भोसले यांनी वनविभागाच्या वरिष्ठ अधिकाऱ्यांना थेट फोन लावण्याचा प्रयत्न केला. मात्र वरिष्ठ अधिकाऱ्यांचे फोन स्विच ऑफ लागताच भोसले अधिक आक्रमक झाले. “कुत्री-मांजरी जशा रस्त्यावर आडव्या जातात, तशाच पद्धतीने वन्य प्राणी आज भरदिवसा फिरत आहेत आणि वनविभागाचे अधिकारी मात्र डोळ्यावर पट्टी बांधून बसले आहेत,” अशी संतप्त प्रतिक्रिया त्यांनी व्यक्त केली.
वनविभाग शेतकऱ्यांनी एखादी झाडाची फांदी तोडली तरी लाखो रुपयांचा दंड वसूल करतो, मग वन्य प्राण्यांकडून होणाऱ्या शेतीच्या नुकसानाबाबत तीच तत्परता का दाखवत नाही, असा सवालही यावेळी उपस्थित करण्यात आला. बिबट्यापासून संरक्षण करायचे असेल तर खुशाल करा, मात्र शेतकऱ्यांच्या जीवाची जबाबदारी कोण घेणार, असा थेट सवाल शेतकऱ्यांनी केला.
शासनाने तात्काळ बिबट्याचा बंदोबस्त करावा. अन्यथा उद्यापासून शेतकरी संघटितपणे शेतीकाम बंद करून वनविभागाच्या कार्यालयात मुक्काम ठोकणार असून, त्या काळातील खाण्या-पिण्याची जबाबदारी प्रशासनाने घ्यावी, अशी मागणी निवेदनाद्वारे करण्यात आली आहे. शासनाला वन्य प्राण्यांचा योग्य बंदोबस्त करता येत नसेल तर ‘जगाचा अन्नदाता’ असलेल्या बळीराजाला सुरक्षित ठिकाणी स्थलांतरित करावे आणि मग वन्य प्राण्यांचे संरक्षण करावे, असे परखड मत श्री. भोसले यांनी मांडले.
या आंदोलनाच्या वेळी शेतकरी संघटनेचे अध्यक्ष श्री. कमलाकर नाना भोसले, आखाडे गावचे सरपंच श्री. सखाराम गायकवाड आप्पा यांच्यासह आखाडे–हुमगाव पंचक्रोशीतील असंख्य संतप्त शेतकरी उपस्थित होते. प्रशासन या गंभीर प्रश्नाकडे तातडीने लक्ष देणार का, याकडे संपूर्ण परिसराचे लक्ष लागले आहे.
