महाराष्ट्रातील पर्यावरण संवर्धन आणि स्वच्छतेच्या चळवळीला नवे बळ देणाऱ्या पाचगणी नगरपरिषद ने “माझी वसुंधरा अभियान ५.०” अंतर्गत १५ हजारांपेक्षा कमी लोकसंख्या गटामध्ये राज्यात प्रथम क्रमांक पटकावत अभिमानास्पद कामगिरी नोंदवली आहे. स्वच्छता, पर्यावरण संवर्धन आणि शाश्वत विकास या तिन्ही क्षेत्रांत सातत्यपूर्ण, नियोजनबद्ध आणि लोकसहभागावर आधारित काम केल्यामुळे हा राज्यस्तरीय सन्मान प्राप्त झाला. भूमी थिमॅटिक विभागातही उत्कृष्ट कामगिरी करत पाचगणीने आपल्या कार्यक्षमतेची ठाम छाप राज्यभर उमटवली आहे.
या यशामागे प्रशासन, कर्मचारी आणि नागरिक यांचा एकत्रित सहभाग महत्त्वाचा ठरला असला, तरी नगराध्यक्ष म्हणून दिलीप भाऊ बगाडे यांनी घेतलेली पुढाकारपूर्ण भूमिका विशेष अधोरेखित होते. पदभार स्वीकारल्यानंतर केवळ दोन महिन्यांच्या कालावधीत त्यांनी स्वच्छता, कचरा व्यवस्थापन आणि शहर सुशोभीकरण या बाबींवर स्वतः लक्ष केंद्रीत केले. “स्वच्छ सुंदर पाचगणी” ही संकल्पना केवळ घोषवाक्य न राहता ती प्रत्यक्षात उतरावी, या ध्येयाने त्यांनी सर्व प्रभागांमध्ये स्वच्छतेची शिस्तबद्ध यंत्रणा उभी केली.
नगरपालिकेच्या प्रत्येक विभागात नियमित पाहणी, कचरा साठा होऊ न देण्याचे कठोर निर्देश, नागरिकांमध्ये जागृती मोहीम, हरित उपक्रमांची अंमलबजावणी आणि विकासकामांमध्ये पारदर्शकता या त्यांच्या कामाच्या प्रमुख वैशिष्ट्यांमुळे शहराच्या व्यवस्थापनात सकारात्मक बदल जाणवू लागला आहे. अनेक वर्ष नगरसेवक म्हणून आणि उपनगराध्यक्ष पदाचा अनुभव असल्यामुळे प्रशासनातील बारकावे त्यांना चांगले ज्ञात आहेत. त्याचा उपयोग करून त्यांनी निर्णयप्रक्रिया अधिक गतिमान केली आणि विविध सभांमधील अजेंडे बहुमताने यशस्वीरीत्या मंजूर करून घेतले.
शहराच्या सर्वांगीण विकासासाठी दिवसातील जास्तीत जास्त वेळ नगरपालिकेच्या कामकाजाला देण्याची त्यांची कार्यशैली विशेष उल्लेखनीय आहे. स्वच्छता, रस्ते सुधारणा, पर्यावरण संवर्धन, पाणी व्यवस्थापन आणि पर्यटन विकास या सर्व आघाड्यांवर एकत्रित दृष्टीकोन ठेवून ते काम करत आहेत. पाचगणीचा चेहरामोहरा बदलण्याच्या ध्येयाने त्यांनी विकासाला वेग देण्याचा संकल्प केला असून त्यासाठी प्रशासन आणि लोकप्रतिनिधींमध्ये समन्वय निर्माण करण्यात ते यशस्वी ठरत आहेत.
या सर्व कार्याला राज्याचे मदत व पुनर्वसन मंत्री मकरंद आबा पाटील यांचे मार्गदर्शन आणि नेतृत्व लाभत आहे. त्यांच्या प्रेरणेने विकासकामांना आवश्यक दिशा आणि गती मिळत असल्याचे स्थानिक स्तरावर मानले जाते. राज्यस्तरीय उपक्रमांशी शहराचा प्रभावी समन्वय साधत, शाश्वत विकासाच्या दृष्टीने आवश्यक पायाभूत सुविधा मजबूत करण्यावर भर देण्यात येत आहे.
पर्यावरणपूरक उपक्रमांमध्ये वृक्षारोपण, जलसंधारण, प्लास्टिकविरोधी मोहिमा, सार्वजनिक स्वच्छता उपक्रम आणि नागरिकांच्या सक्रिय सहभागातून उभारलेले हरित प्रकल्प यांचा समावेश आहे. या सर्व उपक्रमांमुळे पाचगणी शहराची ओळख स्वच्छ, सुंदर आणि पर्यावरणपूरक पर्यटनस्थळ म्हणून अधिक दृढ होत आहे. “माझी वसुंधरा” अभियानात मिळालेला सन्मान हा केवळ पुरस्कार नसून शहराच्या सामूहिक प्रयत्नांची पावती आहे, अशी भावना नागरिकांमध्ये व्यक्त होत आहे.
नगराध्यक्ष दिलीप भाऊ बगाडे यांच्या नेतृत्वाखाली प्रशासन, कर्मचारी आणि लोकप्रतिनिधी यांनी दाखवलेली कार्यक्षमता आगामी काळातही कायम ठेवण्याचा निर्धार व्यक्त केला जात आहे. विकासकामांमध्ये सातत्य, पर्यावरण संरक्षणाला प्राधान्य आणि लोकसहभागावर आधारित प्रशासन या त्रिसूत्रीवर पाचगणी पुढे वाटचाल करत आहे.
राज्यस्तरावर मिळालेला प्रथम क्रमांक हा भविष्यातील मोठ्या उद्दिष्टांची नांदी ठरत असून स्वच्छता आणि शाश्वत विकासाच्या क्षेत्रात पाचगणीचे नाव देशभरात गौरवले जावे, यासाठी सर्व स्तरांतून प्रयत्न सुरू आहेत. विकास, पारदर्शकता आणि जनहित यांचा समतोल राखत शहराचा दर्जा अधिक उंचावण्याच्या दिशेने सुरू असलेली ही वाटचाल पाचगणीच्या उज्ज्वल भविष्यासाठी आशादायी मानली जात आहे.
