मुबंई (प्रतिनिधी) महाराष्ट्रातील पर्यावरण संवर्धन आणि स्वच्छतेच्या चळवळीला नवे बळ देत पाचगणी नगरपरिषदेनं “माझी वसुंधरा अभियान ५.०” अंतर्गत १५ हजारांपेक्षा कमी लोकसंख्या गटात राज्यात प्रथम क्रमांक पटकावला आहे. राजधानी मुंबई येथे उपमुख्यमंत्री सुनेत्रा पवार यांच्या हस्ते पाचगणी नगरपालिकेला हा राज्यस्तरीय सन्मान प्रदान करण्यात आला. स्वच्छता, पर्यावरण संवर्धन आणि शाश्वत विकास या तिन्ही क्षेत्रांत सातत्यपूर्ण, नियोजनबद्ध आणि लोकसहभागावर आधारित कामगिरीमुळे पाचगणीने ही मानाची कामगिरी नोंदवली.
“माझी वसुंधरा” अभियानाच्या माध्यमातून निसर्ग, पाणी आणि झाडे वाचवण्याचा संदेश देत पर्यावरणपूरक विकासाची दिशा राज्यभरात दृढ होत असताना, पाचगणीच्या उपक्रमांनी आदर्श निर्माण केला आहे. नगरपरिषदेने कचरा व्यवस्थापन, प्लास्टिकविरोधी मोहिमा, जलसंधारण आणि व्यापक वृक्षारोपण या उपक्रमांची प्रभावी अंमलबजावणी केली. सार्वजनिक स्वच्छता उपक्रमांबरोबरच नागरिकांच्या सक्रिय सहभागातून उभारलेले हरित प्रकल्प हे या यशाचे मुख्य आधार ठरले.
या यशामागे नगराध्यक्ष दिलीप भाऊ बगाडे यांचे नेतृत्व विशेष अधोरेखित होत आहे. पदभार स्वीकारल्यानंतर अवघ्या दोन महिन्यांत त्यांनी स्वच्छता, शहर सुशोभीकरण आणि शिस्तबद्ध कचरा व्यवस्थापनावर लक्ष केंद्रित केले. “स्वच्छ सुंदर पाचगणी” ही संकल्पना प्रत्यक्षात उतरवण्यासाठी त्यांनी सर्व प्रभागांमध्ये नियमित पाहणी, कचरा साठा रोखण्यासाठी कठोर निर्देश आणि नागरिकांमध्ये जागृती मोहीम राबवली. त्यांच्या अनुभवसंपन्न प्रशासनशैलीमुळे निर्णयप्रक्रियेला वेग आला असून विविध विकासकामांना चालना मिळाली आहे.
शहराच्या सर्वांगीण विकासासाठी स्वच्छता, रस्ते सुधारणा, पाणी व्यवस्थापन आणि पर्यटन विकास या क्षेत्रांत एकात्मिक दृष्टीकोन स्वीकारण्यात आला आहे. प्रशासन, कर्मचारी आणि लोकप्रतिनिधी यांच्यातील समन्वयामुळे विकासकामांना गती मिळत असल्याचे स्थानिक स्तरावर मानले जाते. या कार्याला राज्याचे मदत व पुनर्वसन मंत्री मकरंद आबा पाटील यांचे मार्गदर्शन लाभत असून राज्यस्तरीय उपक्रमांशी शहराचा प्रभावी समन्वय साधण्यात आला आहे.
पर्यावरण संवर्धनाच्या दृष्टीने भूमी थिमॅटिक विभागातही पाचगणीने उत्कृष्ट कामगिरी नोंदवली. हरित पट्टे निर्माण करणे, पाणीसाठा वाढवण्यासाठी जलसंधारण प्रकल्प राबवणे आणि पर्यावरणपूरक पर्यटनाला चालना देणे या उपक्रमांमुळे शहराची ओळख स्वच्छ, सुंदर आणि पर्यावरणपूरक पर्यटनस्थळ म्हणून अधिक बळकट झाली आहे. नागरिकांनीही या मोहिमेला उत्स्फूर्त प्रतिसाद देत स्वच्छतेची शिस्त आणि हरित जीवनशैली स्वीकारली.
राज्यातील पर्यावरणीय उपक्रमांना नवी दिशा देण्याच्या प्रयत्नांत हा सन्मान महत्त्वाचा टप्पा मानला जात आहे. महाराष्ट्र सरकारच्या शाश्वत विकासाच्या धोरणाशी सुसंगत कामगिरी करत पाचगणीने राज्यभर ठसा उमटवला आहे. स्थानिक प्रशासन, कर्मचारी आणि नागरिक यांच्या संयुक्त प्रयत्नांची ही पावती असल्याची भावना शहरवासीयांनी व्यक्त केली.
दरम्यान, माजी उपमुख्यमंत्री अजित पवार यांच्या निधनानंतर नव्या नेतृत्वाखाली पर्यावरणीय उपक्रमांना गती देण्याचा संदेश या कार्यक्रमातून देण्यात आला. राज्यस्तरावर मिळालेला प्रथम क्रमांक हा पाचगणीच्या भावी विकासाचा नवा पाया ठरत असून स्वच्छता आणि शाश्वत विकासाच्या क्षेत्रात शहराचे नाव देशपातळीवर गौरवले जावे, यासाठी सर्व स्तरांतून प्रयत्न सुरू असल्याचे नगरपरिषद प्रशासनाने स्पष्ट केले.
