कुडाळ , ता. जावळी:
शिक्षण क्षेत्रात आपल्या सडेतोड आणि प्रेरणादायी कार्यामुळे विशेष ओळख निर्माण करणारे श्री. उस्मान रहिमतुल्ला मणेर यांची नुकतीच शिक्षण विस्तार अधिकारी या पदावर पदोन्नती झाली आहे.
गेल्या जवळपास चार दशके शैक्षणिक सेवेत सातत्याने योगदान देत, गुणवत्ता, शिस्त आणि कार्यक्षमतेचा आदर्श त्यांनी आजवर उभा केला आहे.
१ डिसेंबर १९८६ रोजी आपल्या सेवेची सुरुवात घोटेघर येथून केली आणि त्यानंतर काटवली, वेळापूर, डांगरेघर, हुमगाव, आंबेघर, कुडाळ, हातगेघरमुरा या गावांतील शाळांमध्ये त्यांनी विद्यार्थ्यांना ज्ञानदान केले. त्यांच्या अध्यापनशैलीला आणि विद्यार्थ्यांवरील प्रेमळ दृष्टिकोनाला समाजातून नेहमीच सकारात्मक प्रतिसाद मिळत गेला.
यानंतर केंद्रप्रमुख म्हणून आनेवाडी व हातगेघर केंद्रांमध्ये त्यांनी उल्लेखनीय कामगिरी केली. शैक्षणिक उपक्रम, गुणवत्ता सुधारणा आणि शिक्षकांमध्ये संघभावना निर्माण करण्यात त्यांचे योगदान मोलाचे ठरले.
बीट खर्शी बारामुरे, ता. जावळी या ठिकाणी आता शिक्षण विस्तार अधिकारी म्हणून पदभार स्विकारताना, त्यांनी आपले दीर्घकालीन अनुभव गावागावातील शैक्षणिक पातळी उंचावण्यासाठी वापरण्याचा निर्धार व्यक्त केला आहे.
श्री. मणेर यांनी M.A.B.Ed. अशी शैक्षणिक पात्रता प्राप्त केलेली असून, त्यांच्या सर्वांगीण कार्यशैलीला तालुक्यातील शिक्षक, विद्यार्थी व पालकांकडून भरभरून शुभेच्छा मिळत आहेत.
ही पदोन्नती म्हणजे त्यांच्या शिस्तप्रिय, निष्ठावान सेवाभावाची आणि शिक्षण क्षेत्रातील दीर्घकाळच्या समर्पणाची पावतीच म्हणता येईल.
